საქართველოში მიმდინარე ჯანდაცვის რეფორმის მთავარი პარტნიორი
ჩეხეთის რესპუბლიკის კარიტასი არის ერთ-ერთი მთავარი საერთაშორისო მხარდამჭერი საქართველოს ჯანდაცვის რეფორმის პროცესში. 2015 წლიდან ორგანიზაცია მჭიდროდ თანამშრომლობს საქართველოს ჯანდაცვის სამინისტროსთან, რათა თანამედროვე სტანდარტებით განახლდეს ქვეყნის ჯანდაცვის სისტემა და გაუმჯობესდეს პირველადი ჯანდაცვის ხარისხი. ჩეხეთის რესპუბლიკის კარიტასმა შექმნა ეროვნული ელექტრონული სამედიცინო ჩანაწერების სისტემა და პირველადი ჯანდაცვის მართვის ელექტრონული საინფორმაციო სისტემა, შეიმუშავა 30 ეროვნული კლინიკური პროტოკოლი და გადაამზადა ათასობით სოფლის ექიმი არაგადამდები დაავადებებისა და მენტალური ჯანმრთელობის მართვაში მთელ ქვეყანაში.
COVID-19-ის პანდემიის დროს, ჩეხეთის რესპუბლიკის კარიტასმა მნიშვნელოვანი როლი შეასრულა პანდემიით გამოწვეული კრიზისის მართვაში — გადაამზადა 1,100-ზე მეტი სოფლის ექიმი, შექმნა COVID-19-ის ლაბორატორიული სისტემა და უზრუნველყო აუცილებელი სამედიცინო აღჭურვილობა პანდემიით გამოწვეული კრიზისის დასაძლევად.
„ჩეხეთის რესპუბლიკის კარიტასისთვის ჯანდაცვის სექტორის გაძლიერება და ინკლუზიური სერვისების მხარდაჭერა არის გასაღები ძლიერი და თანასწორი ჯანდაცვის სისტემის შექმნისთვის საქართველოში. პარტნიორებთან ხანგრძლივი თანამშრომლობის გზით, ჩვენ მხარს ვუჭერთ მდგრად რეფორმებს, რომლებიც აუმჯობესებს ხელმისაწვდომობას, ხარისხს და ღირსეული ზრუნვის შესაძლებლობას ყველა მოქალაქისთვის — განსაკუთრებით ყველაზე მოწყვლადი ადამიანებისთვის. ჩვენი მამოძრავებელი ძალაა პროფესიონალების მხარდაჭერა, მათი კვალიფიკაციის ამაღლებაზე ზრუნვა და იმ პოლიტიკის დოკუმენტების შექმნაში მონაწილეობის მიღება, რაც სისტემებს უფრო ძლიერს და ინკლუზიურს ხდის,“ — ამბობს რუსუდან ჩხუბიანიშვილი, ჯანდაცვისა და სოციალური პროექტების მენეჯერი.
ჩეხეთის რესპუბლიკის კარიტასმა დიდი წვლილი შეიტანა ონკოლოგიური დაავადებების პრევენციის ეროვნულ ძალისხმევაში ზუგდიდის სკრინინგ ცენტრის დაარსებით. ინიციატივის ფარგლებში ორგანიზაციამ დააპროექტა და აღჭურვა ცენტრი, ჩაატარა ტრენინგები 120-ზე მეტ ოჯახის ექიმთან ონკოლოგიის მიმართულებით და საინფორმაციო კამპანიებში ჩართო 6,000-ზე მეტი მოქალაქე, რაც კიბოს ადრეული გამოვლენის მნიშვნელობაზე ცნობადობის ამაღლებას ისახავდა მიზნად.
ჩეხეთის მთავრობის მხარდაჭერით, ამჟამად მიმდინარეობს პროექტი, რომელიც მიზნად ისახავს არაგადამდები დაავადებებით გამოწვეული ნაადრევი სიკვდილიანობის შემცირებას — განსაკუთრებით კიბოს, დიაბეტის, ქრონიკული ობსტრუქციული ფილტვის დაავადების, გულ-სისხლძარღვთა დაავადებების მიმართულებით — ადრეული გამოვლენის, მკურნალობაზე ხელმისაწვდომობის, ცნობიერების ამაღლებისა და ჯანდაცვის პერსონალის შესაძლებლობების გაძლიერების გზით.
ორგანიზაციამ ხელი შეუწყო საქართველოს პირველი პედიატრიული პალიატიური განყოფილების დაარსებას ჟვანიას პედიატრიულ კლინიკაში. ბავშვთა ჯანდაცვის მიმართულებით განახლდა ეროვნული კლინიკური პროტოკოლები, გადამზადდა 200-ზე მეტი პედიატრი და მედდა. ჩეხეთის რესპუბლიკის კარიტასმა ასევე მხარი დაუჭირა UNICEF-ს ბავშვთა განვითარების დისტანციური მონიტორინგის დანერგვაში (0–6 წელი) 50 სოფლის კლინიკაში, რაც ხელს უწყობს განვითარების შეფერხებების ადრეულ გამოვლენას და დროულ ჩართვას ადრეულ ინტერვენციაში.
